Cuntu: Sutta la Turri Normanna Secunna Parti

munti, acchianannu a Baucina e poi scinniri du' ciumi San Liunardu".
"Iu sti zoni nun li canusciu propiu e mancu l'amici mia"
"E vulevavu junciri a Termini?"
"Se. Ma mi dicissi 'na cosa: comu facìa a sapiri ca portu cuperti? E picchì nun m'ammazzò macari a mìa?"
“Tu mi serbi ppi cosi cchiù 'mpurtanti. D'i tò cuperti 'ntisi lu cjavuru. Arrivamu”
A scinnuta avia finutu i nn'attruvavamu 'nfacci a n'a casa affacciata a mmari.
D'un latu la casa c'aveva a strata, i l'avutru latu u mari. Tuttu 'ntornu c'aveva mura bianchi chini chini di viti miricana. Ciuri dunnegghiè. C'erano peri i ficu, peri i limiuni, pini i avutri arbuli nno tirrenu 'ntornu a casa.

Tri fimmini nisceru d'a porta i taliaru a Totò 'nsutta ma cu la facci simpatica. Mimmu cci dissi ca putevanu accuminciari a cociri. Purtò a Totò sutta 'na pinnata e lu fici assittari nn'on sofà. Cci detti puru n'anticchia di tabbaccu.
Totò carricò la pipa i cci spiò:
“Mastru Mimmu, mi livassi nà curiosità: ppi chiddu chi sacciu iu, nun ci sunnu cunfini 'ntra Palemmu i Temmini. Di chi cunfini parrava anturazzu?”
“Comu? Ancora nun hai caputu? Stava parrannu d'u cunfini d'a mè terra. Cca nun vennu i sbirri i nemmancu li surdati, picchì cca cumannu iu!”
A Totò cci parsi tutto sdatu! Taliannulu 'nta facci cci pigghiò nu scantu ca nun sapeva diri i sa chiantò. Macari Mimmu si zittiu i si stettiru quacchi menz'ura senza parrari. Li fimmini li chiamaru picchì eramu pronti ppi manciari.
Manciaru pasta c'u sucu ch'i sardi, pisci cuciutu nn'a rarigghia i sardi a beccaficu. Si vippiru un vinu biancu ca a Totò ci parsi na' maravigghia. Mentri manciavanu, parravanu sulu i fimmini. Mimmu taliò a Totò tuttu u tempu e iddu si sinteva tuttu scantatu c'u ddà taliata strana.
Comu fineru di manciari, Mimmo affirrò a Totò p'un brazzu. Dintra di iddu, Totò 'ntisi nà strana 'mprissioni: nun ci piaceva ppi nenti dda' pigghiata di brazzu.
“Camina ccu mmia Totò, oramai arrivò l'ura”
“L'ura di chi?” cci spiò subbitu.
“L'ura di scannariti”
Totò gnusciò. Mancu si pruvò a fuirisinni, picchì oramai aveva caputu bbonu ca Mimmu era milli voti cchiù veloci e cchiù forti di iddu: e poi, dunni vuleva iri ca c'eranu li mura tuttu 'ntornu?
Passaru supra nu passìu di lignu i arrivaru supra nu' scogghiu. Mimmu attaccò a Totò 'nterra cu certi catini grossi comu li so pusi. Mentri l'attaccava, parrava:
“Nna stu postu vinniru arreri l'Antichi Ddei. Ccà nun c'è Geova, nemmancu Allah. U Sarvaturi ccà nun c'avi putiri i nemmancu Buddha ti po' cunsulari. Ccà cumanna u Ddiu du Mari. Ti scannu pi' iddu, accussì iddu nni proteggi ogni ghiornu”
Totò si sinteva cretinu, nun si muveva, nun parrava. Mimmu sinn'iu i Totò nun sapeva 'nzoccu aspittarisi.
Rivugghiu nnò mari. Arrivò u marusu, li cavalluna addivintaru avuti com'un cristianu i ci fineru di 'ncapu,vagnannulu tuttu.
Taliò u mari comu nu bbabbu e l'acqua a nu certu puntu s'arritirò. Un cavalluni ggiganti stava arrivannu... era accussì granni ca mancu si po' mmagginari. U cavalluni sbattuliò a Totò 'nnavanti i 'nnarreri. U mari nun l'agghiuttiu sulu picchì era attaccatu. L'acqua s'arritirò propiu mentri l'urtima luci sinn'iava d'arreri e' muntagni.
Totò vitti la cosa chi s'avvicinava nn'e iddu. Nun la vitti bbonu 'nfinu a quannu nun fu a quacchi vinti brazza di luntananza: un mostru bruttu comu la morti, nà cosa chi nun s'aveva mai mmagginatu. I vuredda di Totò si 'nturciuniaru tutti mentri l'affirrava c'a so manu fridda i lippusa.

Iccò nà vuci i s'arruspigghiai tuttu 'nsemmula!
“Minchia!” pinsò “M'addurmiscivu!”. Stava sutta o' nuci dunni avevanu manciatu. I dui Marturana pripararu li cavaddi ppi partiri arreri. Peppi lu taliò rirennu i parrò:
“Totò, durmevi com'un picciriddu i mi siddiava arruspigghiariti! Ora però ninn'amu a gghiri ca sta scurannu”
Totò si susiu i parteru. Si sinteva stranu: s'aveva 'nsunnatu tutti cosi?
Vittiru la turri i si ficiru la strata senza parrari. Arrivaru sutta la turri i vittiru un cristianu ch'i capiddi rrussi i c'un marruggiu 'nte manu. Cci fici 'nsigna di firmarisi i parrò rirennucci 'nta facci a Totò:
“Bognornu a vuautri: ppi passari di ccà s'avi a pahari u pedaggiu!”[/justify]